០៦ កញ្ញា ២០២៥ / 06 September 2025
សកម្មភាពបែបណាដែលចាត់ទុកថាជាជនក្បត់ជាតិ?
-ក្នុងជំពូកទី២ ផ្នែកទី១ នៃក្រមព្រហ្មទណ្ឌកម្ពុជា ឆ្នាំ២០១០ មាត្រា ៤៤០ ចែងថា អំពើប្រគល់ឲ្យរដ្ឋបរទេស ឬ ភ្នាក់ងារបរទេស នូវដែនដីជាតិទាំងស្រុង ឬ មួយផ្នែក ត្រូវផ្តន្ទាទោសដាក់ពន្ធនាគារអស់មួយជីវិត ។
-កំណែច្បាប់សញ្ជាតិ ដែលបង្កើតឡើងដោយរបបគ្រួសារហ៊ុន មាត្រា២៩ ចែងជាអាទិ៍ថា សកម្មភាពដែលនាំឲ្យអន្តរាយ ដល់អធិបតេយ្យភាពជាតិ បូរណភាពទឹកដី ជាដើម ជាទង្វើក្បត់ជាតិ និង ត្រូវរងទណ្ឌកម្មដកសញ្ជាតិខ្មែរ ។
យោងតាមក្រមព្រហ្មទណ្ឌ និង កំណែច្បាប់សញ្ជាតិនេះ យើងត្រូវពិចារណាទៅលើសកម្មភាព របស់ លោក ហ៊ុន សែន ដូចតទៅ ៖
-ឆ្នាំ២០០១ លោក ហ៊ុន សែន បានចុះអនុស្សរណៈ នៃការយោគយល់គ្មា (MOU) ជាមួយថៃ ដែលនាំទៅដល់ការផ្ដល់ឱកាសឲ្យភាគីថៃ គ្រប់គ្រងកោះគុត និង ត្រួតត្រាកាន់តែណែនដៃ លើតំបន់សមុទ្ររបស់កម្ពុជា ក្នុងឈ្មោះត្រួតស៊ីគ្នា ។
-ឆ្នាំ២០០៥ លោក ហ៊ុន សែន និង បក្ខពួក បានធ្វើសន្ធិសញ្ញាបំពេញបន្ថែម ជាមួយវៀតណាម ដោយរំលោភលើមាត្រា២ នៃរដ្ឋធម្មនុញ្ញកម្ពុជាឆ្នាំ១៩៩៣ ហើយបានអនុវត្តកាត់ទឹកដីកម្ពុជាតាមព្រំដែន កោះត្រល់ និង ចង្កោមកោះក្រចកសេះ ឲ្យវៀតណាម ។ លើមូលដ្ឋាន នៃសន្ធិសញ្ញាបំពេញបន្ថែមនេះហើយ រដ្ឋាភិបាលលោក ហ៊ុន សែន បានបន្តអនុវត្តកិច្ចព្រមព្រៀងដែនទឹកប្រវត្តិសាស្ត្រជាមួយវៀតណាម ឆ្នាំ១៩៨២ សន្ធិសញ្ញាស្ដីពីគោលការណ៍ដោះស្រាយព្រំដែន និង កិច្ចព្រមព្រៀងស្ដីពីលក្ខន្តិកៈព្រំដែន ឆ្នាំ១៩៨៣ ព្រមទាំង សន្ធិសញ្ញាកំណត់ព្រំដែនរដ្ឋ ជាមួយវៀតណាម ឆ្នាំ១៩៨៥ ដែលសុទ្ធតែខុសច្បាប់ និង បង្កលក្ខណៈឲ្យវៀតណាមត្រួតត្រា ដែនសមុទ្រកម្ពុជាយ៉ាងតិច ៤ម៉ឺនគ.ម.ការ៉េ រហូតបាត់បង់ភូមិរបស់ប្រជាពលរដ្ឋខ្មែរ លើដីគោកជាច្រើនកន្លែងទៀត ។
-ឆ្នាំ២០២៥ លោក ហ៊ុន សែន បានប្រកាសបញ្ជាជាសាធារណៈឲ្យភាគីថៃ ចូលរាយបន្លាលួស និងព័ទ្ធយកទឹកដីកម្ពុជាតាមចិត្ត ។
សកម្មភាពរបស់លោក ហ៊ុន សែន ខាងលើ បានបញ្ជាក់យ៉ាងច្បាស់ ពីអំពើក្បត់ជាតិរបស់គាត់ ដែលត្រូវផ្តន្ទាទោសតាមច្បាប់ជាធរមាន។ តើពលរដ្ឋខ្មែរ ត្រូវការមេដឹកនាំក្បត់ជាតិ ក្បត់ពលរដ្ឋដូចត្រកូល ហ៊ុន ឲ្យបន្តដឹកនាំប្រទេសទៀតទេ ?
Khmer
English
French
